قــصــتــي مــع الــفــاتــنــة 8

اللي ماتابع معانا القصة من الأول هذي

الأجزاء السابقة

الجزءالأول

الجزءالثاني

الجزءالثالث

الجزءالرابع

الجزءالخامس

الجزءالسادس

الجزءالسابع

....................

دشيت القهوة ولا بوناصر نايم في بواحمد

نوم ليييش ماقطيت الجيكر على بوثنين

ماتدري اني طالع بااااااااون

(قاعدين يلعبون كوت)

انا شفت حلج بوناصر مشرع تقول

حلج (دامـبـي) ابو هيكارو رفيجة بو الغرندز

قلت اكيد ألحين بيشتغل رعد الفضاء

وبيصير تفلع بينهم وخاصة ان وحش

فيغا (بـومـهـدي) غورو غورو.. كان موجود

قلت خل اسحب نفسي بسكات واقند راسي بالهواء

الطلق ابرك من مجابل هالمفترسين

ومع اول نفس دخان وعلى انغام رائعة

بونوره الأماكن كلها مشتاقه لك

تذكرت الذي مضى مع فاتنتي

....................

وبعد مكالمتي اليتيمه معاها وبعد طول

انتظار جادت علي الأيام بعد حمال دام

اربع شهور وبعد مخاض عسير باتصال

ثاني منها .. أ ل و

حتى الألو مالتها غير .. تحسسك لي سمعتها

ان الأصوات النسائية اللي مرت عليك قبلها

ممكن تكون دوسة بريك جيب بوشنب

تسكيرة بخار حفيز

كلش كلش صوت كستنه تم هتك

عرضها بدوة فحم بمخيم ربيعي

ماعلينا سلمت ورديت السلام

وبعد السلامات قلتلها شهالغيبة

عسى المانع خير

.....

ابد ماكو الا الخير بس لهيت شوي

.....

بس انتي اختفيتي من الساحه قبل كنت

اصادفج بجمعيه بمطعم بمول

ومن آخر مكالمه غطيتي؟!

.....

شقولك..الموضوع شوي معقد

.....

انا بعد هالجمله على طول تذكرت اغنية

فقيد الساحه بوالطلي (طلال مداح)

كل مادقيت في ارض وتد من

رداة الحظ وافتني حصاة

وقلتلها ليش شصاير؟

.....

الشي اللي انت ماتعرفه اني اعتبر

مخطوبه حق واحد من اهلي لأن اهلي

من صغرنا كانو يقولون فلانه حق فلان

وتبي الصج حسيت بالذنب يوم كلمتك

.....

اهني انا حسيت جنه محمد علي كلاي

حاطني بربعه وطايح فيني بوكسات

لا وفوق البيعه حاط اغنية طلال

وتررررررحل

استجمعت ماتبقى من ماي ويهي وقلتلها

بصوت مبحوح الحروف

شاللي خلاج تدقين علي مره ثانيه؟!

.....

تصدقني لي قلتلك مادري بالضبط ليش

كل اللي اعرفه اني كنت متضايقه حدي

ولاشعوريا لقيت نفسي امد ايدي بحافظة الكروت

طلعت كرتك ودقيت

.....

بعد هالرد تذكرت اغنية بودوخي الأمل

وقلتلها ممكن اعرف شغله

انتي تحبينه ؟

.....

اكيد احبه

.....

ومع كلمة احبه حاشني زلزال بقوة سبعه

ونص حسب مقياس رختر

وتذكرت اغنية حليم جبااااااااااار

وسكت

.....

ردت مره ثانيه جان تقول احبه مثل اخوي

اثاريها ما كملت الجمله لأنها خنقتها العبره

.....

انزين دامج تحبينه حب اخوي ودام ان لي

الحين ماصار شي رسمي ليش ماتنهين هالسالفه

البايخه وتقولين حق امج او اي احد ترتاحين

له من اهلج وتفكين نفسج من هالمعاناة

.....

انا قاعده افكر بهالشي صارلي مده بس

الموضوع مو بهالسهوله اللي انت متخيلها

السالفه يبيلها ترتيب خاص

.....

تبين رايي الشخصي وبتجرد وبغض النظر

عن اعجابي فيج وبعيد عن كل انانيه من

صوبي ومع حساسية الموضوع انا اشوف

ان الحسم السريع اهو الحل الأنسب

لأن كل تأخير ممكن يصعب الامور اكثر

مما هي عليه الحين وعموما

القرار لج

.....

سامحني ازعجتك معاي ودوخت راسك

ادري المفروض ان سوالفنا تكون غير

بس مثل ماقلتلك حسيت فجأه اني محتاجه

اني اتكلم مع احد ومادري ليش

خذاني احساسي لك

يمكن لأني ارتحتلك من اول مكالمه

ويمكن لأن في شي داخلي تجاهك

انا اجهله ماقدر احدد بالضبط

لكن ومن غير لا اجاملك احس اني

قطيت ثقل بعد هالمكالمه

.....

ولو .. انا ماسويت شي .. بالعكس ماتدرين

شكثر فرحت لانج فتحتيلي قلبج وفضفضتي

وبأي وقت تحسين انج بحاجه للحديث

انا موجود .. اسمعلج وتسمعين مني

.....

كلك ذوق .. والحين اسمحلي

.....

مسموحه .. بس فعلا اتمنى اني اسمع

صوتج مره ثانيه

.....

خلك واثق انك راح تسمعه .. ثانيه

وثالثه .. ورابعه

.....

سكرنا التلفون وماغنيت مثل عادتي

هالمره الدنيا اهي اللي غنت

وابتدا ابتدا ابتدا المشوار

.....

وبعد ماتشرقدت مع ذكرياتي هديت الأرجيله

ودشيت على الربع وسويت نفسي توني ياي

مساكم الله بالخير

ها بشر بوناصر شلون الكوت معاك؟

شلون الكوت معاي

شوف ويه بواحمد واحلب تبن

تــابــعـونــي