وقبل لايصعدون دار هالحديث بيني وبين
من كان صديقي المدعو بوخلي
بوراشد مو هذي صاحبتنا اللي خبرك
اي والله بوخلي بس حيل متغيره
اكيد احنا العاده نشوفها طياري
واكثر شي تكون بسيارتها
خلاص خلاص بجك بجك الجماعه مجبلين صوبنا
ضحك بوخلي بثقه وتمتم بهالكلمات
السنارة اخيرا غمزت وكان يقصد ان
البنت صاعده علشانه
رديت عليه وقلتله خل نشوف اذا كانت صاعده
علشانك او علشاني او علشان تقعد بالقهوة
مع البنات وتمشي
قالي شلون بتعرف
قلتله تابعني وشوف واسمع وتعلم
رد علي وقال فير إنف يا بوراشد
قلتله اعتمد
اول ماقعدو اشرت حق القرسون وعلى طول ياني
وقلتله بالحرف الواحد طلبات الجماعه عندي
ارتبك وقالي مسيو ابوراشد وقبل لايكمل جملته فزيت
ورحتلهم ودار هالحوار
مساء الخير
مساء النور
بطلب منكم طلب وارجو انكم ماتردوني
تفضل مع ابتسامات
وعلى طول وجهت حديثي حق ام الميغ
بمناسبة تشريفكم لكافيهي المتواضع
وكونكم الطلب رقم ألف
فالطلبات راح تكون
free
اشكروني وتقبلو الموضوع كون السالفة
مثل اي عرض يقدم بأي مكان تجاري بالمعمورة
رجعت مكاني ولاحظت ان بوخلي
ويهه قام يعطي ألوان
شفيك بوراشد الله يهداك لو واحد من اهلهم مر
وشافك قاعد تكلمهم
بوخلي اكرمنا بسكوتك الله يرضالي عليك
انا ماقلتلك تابع وانت ساكت وبدون لغوة زايده
تطور الموضوع بيني وبين بوخليل بعدها
لين وصلنا لي طريج مسدود جان اقوله
انت ليش ماتبطل من طبعك المليغ
انا مليغ يابوراشد
مليغ وماتنبلع ويبيلي اشرب قنينة ماي
شفاف علشان اهضم سوالفك العويه
افا بوراشد تبيع صاحبك علشان وحده
شبت الحمره عندي جان اقوله
كل من يشوف الناس بعين طبعه
وشنو شفت مني يابوراشد
جان اقوم واروح حق ام الميغ دايركت
ممكن كلمة لو سمحتي
الصراحة البنت كانت جدا زقرت وتجاوبت معاي
رجعنا انا معاها عند بوخلي وقلتله
مو هذي اللي شفناها عند مطعم محمود بشويخ
وتراهنت معاي انك اتييب راسها
ويوم قلتلك تسمحلي ادش معاك بالخط
ضحكت وقلت لي مالك امل تعطيك ويه
بوخليل بعد هالكلمتين صار خرجه وقام يتأتأ
حتته بتته ممأه بهها شككه
جان تنطق ام الميغ وتقول
على فكره انا من زمان ملاحظتكم وملاحظه
تتبعكم حقي بالسيارة بين فتره وفتره
ولا تفتكرون ان صعدتي وقعدتي بالقهوة صدفة
انا بعد هالكلمتين حاشتني ام الركب وقلت ياساتر سترك
بس بنفس الوقت تجرأت وقلتلها
ممكن اناقش الموضوع وياج بالتلفون
ابتسمت وقالت اوكي
سحبت كرت من البوك وقدمته لها بكل أدب
مدت ايدها وخذته بكل رقة مع نظرة شرسة
حق بوخلي وابتسامة شقاقية حقي
بعد هالمشهد التاريخي بوخلي انسحب من
غير كلام وسلام ام الميغ رجعت طاولتها
انا مشيت ونسيت ادفع فاتورتهم
رديت البيت دخلت الوكر لقيت الآنسر مشين
متروس مسجات ضغطت على السبيكر وكان فيه عشر
مسجات كلها سب وتسفل وكان الصوت غريب
لكن الشغله كانت واضحه
فتش عن بوخلي
طبعا انا طاف دشيت الحمام خذيتلي شاور
وبعدها قعدت اتمقط جني قطو ومع سدحتي
واذا بصوت الهاتف
ترلم ترلم ترلم ترلم
وبعدها ابتدا المشوار
وللحديث بقية
ـــــــــــــــــــــــــــ
الصورة انا مع ام الميغ بالهرم
P:
ولا عزاء لك يابوخلي
