ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ومع العد التنازلي لتوديع عام واستقبال آخر
تذكرت آخر مرة اجتمعت فيها مع فاتنتي الجميلة
ميغان : اليوم تقدم لي واحد وماني عارفه شلون اتصرف
بوراشد : مثل كل مره رفضيه
ميغان : هالمره مو مثل كل مره
بوراشد : قولي انج تبينها حجه علشان ننهي هالقصه
ميغان : انت اناني
بوراشد : تدرين شكثر عرضت عليج فكرة الزواج بره
وبعيد عن كل عقد مجتمعنا
ميغان : وانت تدري اني مستحيل ارتبط فيك بهالطريقة
بوراشد : وانتي عارفه ان زواجي منج بالطريقه التقليديه
صعب ان يتم اذا ماكان مستحيل
ميغان : يعني برايك اني اخسر اهلي وناسي على زواج مادري
اذا كان راح يستمر او لأ
كان ردها الأخير بمثابة رصاصة الرحمة
سكت شوي وبعدها قمت من مكاني
وسمعتها تقول هالجملة
انت ريال وتقدر تسوي اللي انا اعجز عنه لكن
ضعفك جدام ظروفك او يمكن عدم جديتك
اهي اللي وصلتنا لي هاللحظة
نزلت على راسها وحبيته
وهمست بإذنها
الأيام راح تثبتلج ان طريجي بالحياة
اذا مامشيته معاج ماراح امشيه مع غيرج
فجأة ومع دشة السنة اليديدة
سمعت بوعلي يقولي
وين رحت بوراشد الجسد حاضر والفكر بعيد
كل عام وانت بخير بوعلي
وعساها سنة فرح تمسح آلام اللي قبلها
وانت بصحة وسلامة بوراشد بس كنت اتمنى ان
هالسنة مامرت إلا وانت مع شريكة الدرب
ضحكت من قلبي على هالكلمتين
قالي شفيك تضحك
طريجي يابوعلي الظاهر سكة سد
تمنيت لحظتها مسج تلفون اي شي من ريحتها
لكن للأسف مرت دقيقه ساعه يوم
ومالقيت غير صمت موحش
وللحديث بقية
وايام حبك :)
