محمد الوشيحي كاتب كويتي .. ولادة مدونه كويتيهقبل فتره امتدح الوشيحي ولادة وبعدها بفتره
نشرت ولادة مقال للوشيحي
( الإثنين عندهم توجه وطني ولهم ميول شعريه )
........
بوراشد( مواطن كويتي مسكين تفكيره على قده )
قادته اقداره ذاك اليوم الى موقع اسمه
you tube وبالصدفه طاحت عينه على مقطع فيديو
بهالموقع وكان عنوانه (اضاءات .. محمد الوشيحي)
لا اراديا ضغط بصبعه المجكنم على الفيديو
ولا اثنين متجابلين ويسولفون واحد كان متين
وضعف اسمه تركي الدخيل والثاني كان ضعيف
وما زال واسمه محمد الوشيحي وخلوني اشاركم
بعض مادار بهاللقاء الممتع والمثير
........
الوشيحي يقول حق تركي الكويت اكثر دوله فاسده
في الخليج بفضل من الله ومن حكومتنا
( بوراشد مستغرب فساد من حكومتنا مافيها
مشكله بس فساد من الله شلون !!!!! )
........
تركي يقول حق الوشيحي انت قلت
ان الكويت دولة مؤقته
الوشيحي يرد نعم الكويت تتهاوى وايماني زاد
ان الكويت دولة مؤقته لكن لازم
نفرق بين الدوله والوطن وضرب مثال
على العراق وقال ان دولة البعث سقطت
لكن الوطن العراقي موجود وقائم
( بوراشد يبي يعرف شلون بتسقط الكويت )
الوشيحي يرد على تساؤل بوراشد ويضرب هالمثال
تصور ياتركي انك تبي تروح تسوي غسيل كليه
حق ابنك المريض .. يواعدونك بعد 8 شهور
والحجه ان ماعندهم الا جهازين للغسيل
( ورب الكعبه قال جذي )
تركي يسأل الوشيحي كم سنه تتوقع تستمر الدوله
الوشيحي يرد .. اذا استمرو نفس الأشخاص
بالحكومه الدولة ماراح تستمر وكمل حديثه
انا اقصد انو (ان )المؤسسات هذي راح تتساقط
وبالفعل بدأت تتساقط .. يعني نحن الآن نجني
مابعد الدوله المؤقته والحكومه انتهت
والمؤسسات تساقطت وانتهت الدوله المؤقته
( بوراشد صب حوله من هالتحليل .. الحين
الدولة انتهت ولا لأ ماعرفنا )
........
خلصنا من الجانب السياسي نأتي للجانب الشخصي
تركي يسأل الوشيحي شنو مشكلتك مع ساجد العبدلي
الوشيحي يرد .. ساجد كتب عني نقد وطعني في
سلاحي وهو قلمي وانا مارديت لكن لما كتب عن
الدستور ولمح لتعليقه رديت عليه وكتبت
ياكتاب الرئيس (ناصر المحمد) لاتحاولون تعلقون
الدستور لأن احنا النهر اللي يسقي بساتينكم
فلا توقفون النهر لان بدونا ماراح
يكون لكم ذيك المكانه اللي تبونها
(ادري محد فاهم شي من هالطلاسم بس هذا كلامه)
وكمل طلاسمه وقال بعد هالمقال زعل ساجد
ودق علي يعاتبني .. فشعرت اني عورت الرجل
وقلت مهما كان الرجل زميل فكتبت مقال وقلت
ان ساجد فارس وبعدها اثنى ساجد على قلمي
واثنيت على قلمه وتبادلنا الثناء
حتى شارفنا على البكاء .. لكن بعدها بفتره
كسر فيني ساجد وكتب مقال وطعن فيني مره ثانيه
بعدها قلت ما بدهاش يادكتور الحين وجبت
فتوجهت للقبله ونحرته ( لول )
( بوراشد يقول لا تعليق )
........
نأتي الآن للجانب المتحرر للكاتب الوشيحي
تركي يسأل الوشيحي .. ليش ما انتقدت الرئيس
الخرافي يوم كنت تكتب في جريدة الراي
الوشيحي يرد .. جاسم بودي مايسمح بانتقاده
لكن انا اشهد ان سقف الحريه عند جاسم عالي
بعدها استدرك وقال بما معناه ان اللي ما
يهاجمون الخرافي تبا لهم سبع مرات احداهن
في التراب ( ترا والله هذا كلامه ينني هالنابغه )
........
الحين عاد الجانب المهاوشجي عند الوشيحي
يقول الوشيحي حق تركي عن كاتب ساخر تهجم
على ناصر صباح الأحمد وقال عنه كذا وكذا
اقسم بالله يحمد ربه ( أي الكاتب الساخر )
انه مو موجود عندنا ولا عقالي وعقالك مايكفونه
هالمره تركي اللي استغرب مو بوراشد وقاله
يعني انت تؤمن بالعنف ضد الخصم
رد الوشيحي وقال عقالي قلمي وسيفي
وكلاشنكوفي وسجيني ونباطتي
( خوووش وصف متناغم مع الديموقراطيه )
........
نأتي للجانب الثقافي عند الوشيحي
تركي يقوله ليش هاجمت قصيدة عايض القرني
اللي قدمها للمطرب محمد عبده وكان عنوانها
لا إلــــه إلا الـلـه
رد عليه وقاله انا متذوق للشعر اخربش خريبشات
ماتستحق انها تسمى شعر لكن قصيدة عايض
مثل القطوه ( ميااااااو ) اعتقدت في نفسها
انها نمر او نمره وتبي تقفز الجدار لكنها
صعدت صعدت تزحلقت ورجعت .. قصيده سخيفه
سيئه جدا مافيها ملح من الجانب الفني
وهاردلك ياعايض القرني مهزوم 2 صفر
( يلا ياجماعه خلونا نكوكس كلنا ونرجع نكمل )
........
اخيرا الجانب القبلي الثوري عند الوشيحي
بس قبل لا اقول رايه بقول راي
المدونه ولادة بالإنتخابات الفرعيه
تقول ولادة .. أنا لي رأي في الفرعيات
اذا حيدنا موضوع قانونيتها فأنا اجدها
تطور سياسي واجتماعي للقبيله ففي السابق
كان امير القبيله هو المرجعيه يحدد من يخوض
الانتخابات اما الفرعيات فلقد طورت المفهوم
نحو ديموقراطيه اكبر في كيان القبيله انعكس
نحو فهم اعمق للديموقراطيه الفرعيات
خطوة ضرورية للارتقاء بالديموقراطية ولقد
ادت دورها المنشود لذا قد يكون حان الأوان
لتجاوزها ( أحيه يابوسوسو أحيييه )
خلونا نشوف الوشيحي شيقول عن الفرعيات
انا مو متمرد على القبيله انا متمرد على
تسييس القبيله لان الوطن اهم من القبيله
ويقول ان بعض الافراد اللي افخاذهم قليله
في القبيله واعدادهم بسيطه تدهسهم قطارات
الأكثريه ( توت توووت قطر زغنطوط )
........
ختام هالبوست الطويل سمعو هالطرفه
يقولكم في حرامي نط على بيت قديم
وفتش الغرف كلها وآخر شي طاح على غرفه
فيها شيبه نايم على برد ( على جنب )
ولاحظ ان الغرفه متروسه صحون كباب
وكان بنص الغرفه مصباح نفس مصباح المارد
نط على المصباح وفركه .. طلعله المارد
وقاله شتبي الحرامي ماصدق خبر وقاله ابي
مليون رد عليه المارد تبي ليمون رد عليه
الحرامي مليووووووون مو ليمون رد المارد
وقاله ابشر ألحين اييبلك ليمون .. الحرامي
قال شفيه هالخبل .. صحى الشيبه على هاللويه
والتفت على الحرامي وقاله لا اتعب نفسك
مع هالمارد انا صارلي 36 سنه (مادة الحريات)
اقوله ابيك تردني شباب وهو كل يوم اييبلي
صحن كباب .. وي وي
........
هذا لنك مقابلة الوشيحي مع تركي الدخيل
........
إ ضــــا ء ة
ـــــــــــــــــــــــ
الرئيس العراقي المقبور كان يفوز بإنتخابات
الرئاسة بنسبة 99 بالميه
بوش الصغير كان الفرق بينه وبين آل غور
لايذكر وكانت في شبهه بالبطاقات الإنتخابيه
ناصر المحمد نال الثقه بفارق 3 اصوات رسمي
الديموقراطيه شلون صايره
وسلمولي على اصحاب العقول النيرة
هذا البوست اهداء للعزيز بوخالد :)
........
تـــا بـــعـــو نـــي
