كش ملك :) .. اوووف قويه بوراشدتدري شنو مشكلتك بوفارس
أوووو بدينا بالتفلسف .. شنو مشكلتي
ياكسباروف ..(بوفارس يتحلطم بعد الكشه)
مشكلتك انك دوم تحط عينك على العسل وتنسى
ان الملكه اهي راس المال
ولييييييه شكو الشطرنج بالعسل والنحل
انا اقولك .. انت يوم شفتني حركت الفيل
عينك على طول طارت على القلعه .. لو فكرت
شوي وحسبت حركة وزيري بعد هالنقله جان
ماخسرت الملك .. يعني انت ضحيت بالأم
علشان تنقذ الجنين يا بوعنتر
طبعا بوفارس ماعجبه كلامي وعطاني نظره
بطرف عينه ومد البوز .. تبون الصج
ماطاوعني قلبي اشوفه مبرطم جان اضربه
بهالبيتين من الشعر الشعبي
........
يابجاد شب النار وادن الدلالي
واحمس لنا يابجاد مايقعد الراس
حملي ثقيل وشلت حملي لحالي
وبصبر على تب الليالي والاتعاس
بصبر كما تصبر عاليات الجبالي
اللي يجيها كثيرن من الناس
ولي خاب ظنك بالرفيق الموالي
مالك مشاريه على باجي الناس
مامداني كملت هالبيتين ولا بواحمد ينط
شعقبه .. عقب مانمت بالريال ياي تراضيه
خلوني اكمل قصتي مع ام الميغ بعدين
اعلمكم شرديت على القصير المكير بواحمد
........
اول ماطارت الطياره خزتني ام الميغ خزه
ارتعدت لها فرائصي (خضني بطني)
........
وقالت تعال انت ماسمعت الشاعر شقال
شقال يا بنت المستكفي سمعينا فاهج
اتطنز حضرتك .. وايد شايف نفسك
علبالك بس انت اللي تفهم .. انت الشاعر
الأديب الفيلسوف الفنان المطلع
........
يبا ماتسوى علي هالكلمتين اللي قلتهم
خلاص ياكلمه ردي مكانج تفضلي ياعزيزتي
ايه خلك سيده معاي رياييل ماتيون إلا
بالعين الحمره (وابتسمت ابتسامه خبيثه)
.......
يقول الشاعر العظيم ابو تمام
نقل فؤادك حيث شئت من الهوى
ماالحب إلا للحبيب الأول
كم منزل يألفه الفتى
وحنينه ابدا لأول منزل
(كامله والكامل الله حلاة وثقافه وخفة دم)
الحين بوتمام يقول الحب للحبيب الأول
وانت تقول غير هالحجي .. تبيني اجذب
بوتمام واصدق بوراشد
........
من صجج بوتمام هذا عفلنقي ولمعلوماتج
كان شيفه جيكر حلي وازيدج من الشعر بيت
كان صوته يلوع الجبد ومن مواليد حوران
يعني اردا فرجان سوريا واول حياته اشتغل
خياط لا وابوه كان يشتغل بخماره يعني
لو على ايامنا جان بعد جم ساعه نشوف ابوه
بأحد بارات بيكاديلي
........
دلي ولا دلك .. بوراشد شفيك انا شعلي من
اصله وفصله انا ابي اعرف شرايك بالكلام
اللي قاله .. الحبيب الأول
........
يبا انتي لا قبلج ولابعدج وتركي عنج
ديج خيبر هالحلي بوتمام وعلميني
شهالحلا اللي يطير العقل .. شي شي
اناقه والخدود مورده والشعر يالله الينه
يهفهف وضحكتج .. أخ من هالضحكه
تصدقين ام الميغ لي ضحكتي الدنيا
بعيوني تصير مثل بستان ورود
.......
واااي منك .. شلون لفيت السالفه
بس احب كلامك واحب وصفك واحب روحك
بوراشد انا مثل الورده ماتفتح
إلا لما يحوشها النور وماتنثر عطرها
إلا لما تتلألأ عليها قطرات الندى
وماترقص إلا لما تعزف نغمات المطر
على اوراقها وانت اليوم شمسي
وهواي وغيمتي
........
بعد هالكلمات انعقد لساني وانا اللي
الكلمات لعبتي .. تمنيت ان الدنيا توقف
والزمن يتجمد على آخر حرف نطقها لسانها
وتساءلت بيني وبين نفسي
هل راح تدوم هالسعاده ولا مثل العاده
كل شي حلو بحياتي مايكتمل
كان داخلي خليط من الخوف والفرح
........
بوراشد .. بوراشد
عمر بوراشد
وين رحت
وهل اجرء اني اروح اي مكان وانتي يمي
بوراشد ودي اسمع منك
بس تبين تسمعين انا كلي لج
........
اليوم انا عمري صبح له ثاني
انتي لعمري اول وانا لعمرج ثاني
روح وجسد لو نفترق لابد نرد ثاني
ثاني يعود العيد بس العمر واحد
والعين مهما تشوف دايم تحب واحد
وانا وانتي اثنين والله ياعمري واحد
واحد يارب الكون عمري ماشوفله ثاني
........
بوراشد .. يابعدهم كلهم
وللحديث بقيه
.........
نرد الحين حق بوفارس وبواحمد
بواحمد انت ليش تحب تصطاد بالماي العكر
وبعدين تعال بقولك .. شفيها لي راضيت
الريال بكلمتين حلوين .. ياخوي اهلنا
يقولون حل لسانك كل الناس خلانك
........
انزين دام لسانك حلو وتعرف السنع
صكني انا بعد في بيتين شعر
بس جذي افا عليك غالي والطلب رخيص
........
يقول الشاعر الحبيب في وصفك العجيب
الفار يِرَث شبيهه فار
يِرَث حلاياه واجناسه
والطيب مايصنعه بيطار
كلن ينكس على ساسه
........
تــــــا بـــعـــو نـــي
