لو نرجع بالزمن سنة للوراء علشان نشوف المشهد التدوينيوخاصة من يسمون نفسهم بالوطنيين
كان من المستحيلات انك تشوف موضوع لهؤلاء
العظام (الجنرالات) ينتقد فيه الرمز
السيد احمد السعدون قدس سره
ولو نرجع سنتين هم كان من المعجزات انك تشوف
قلم من المدونين المعتقين ينتقد الأب الروحي
للتدوين عبداللطيف الدعيج دام ظله
شاللي صار وقلب الحال وليش
انا اجاوبكم وبكل وضوح
عقلية المدون الكويتي مطابقة لعقلية الطفل
خلونا مع المناضل بوشميس (الدعيج)
الأخ غلط وانتقد المدونين وقال عنهم ناشئة
مع ان الكلمة ابدا مافيها اي تجريح لأنهم
بالمقارنة مع تاريخه النضالي يطلعون ناشئة
وعودهم طري لكن اطفالنا الحلوين ماعجبهم ان
بابا عود يقول عنهم هالوصف
وبعدها عينك ماتشوف الا النور بوستات وفوتو شوب
وقصايد وسب وزيران وحجي له اول ماله آخر
على من كان يسمى بالأب الروحي
ومع العلم اني في مدونتي كنت اشلخ الأب الروحي
تشلخ بس وقتها كان بوشميس ما تجرأ عليهم
فكان كلامي حينها يعتبر خارج نطاق الوطنية
خلصنا من بوشميس دام ظله
نروح حق الرمز العم قدس سره
بوعبدالعزيز بدأ اللغط والهمز واللمز يزيد عليه
من يوم مانزل الشارع مع مظاهرات بورميه ومسلم
بس كان هالنقد على استحياء
لكن بعد موقفه من الغرفة تفجر الغضب
عليه وصار الضرب عليه اشكره
انزين ليش تبدل الحال مع الرمز صاحب العصمة
!!!!!!!!!!!!!!
الجواب جدا بسيط
الطفل دائما يحتاج لأب أو شقيق اكبر يوجهه
ويرسمله خارطة طريق حق رويلاته المجكنمة
الشقيق الأكبر لأطفالنا المدونين اوحى لهم
ان الرمز قام يخورها شوي ويبيله قرصة اذن
وفعلا مدونينا المعتقين ماقصرو وقامو بالمهمة
وللعلم ايضا اني مستلم بوعبدالعزيز
انتقاد وتشلخ من ايام سيدنا نوح
لكن طبعا كلامي كان مايعجب لأن المصالح وقتها
كانت متشابكة ومتشربكة
اكتفي بهذا القدر اليوم
ولي لقاء معاكم البوست الياي
وراح يكون موضوعنا
شينة الحلايا تمتطي جواد خيال المآته
على خلفية موضوع الخرفان الضخايا
ـــــــــــــــــــــ
سألني البعض ليش مسكر التعليقات
ويسعدني اني اقولكم ان المواضيع اللي
قاعد اطرحها بهالفتره مو قابله للنقاش عندي
لأنها بمثابة مذكرات
يعني دش اقرأ وكون رأي سواء معاي او ضدي
وبعدها توكل .....
ــــــــــــــــــــــ
قبل لا أختم
الصراحة دشيت على الجمهور اللي متابع مدونتي
وتبون الصج تفاجأت بهذا الكم من المتابعة
لمدونة دايخة مثل مدونتي
الصورة تحت عبارة عن احصائية
تشرح الحركة اليومية لمدونتي الكحيانة
salveتابعوني .....
