واتس ذا بروبلم بوراشد
بلا بروبلم بلا براطم
شفييييييييييييييييك
شفيني ! ماتشوفين هالتلح اللي
بالطاوله اللي يمنا شلون يخوزر
وانا شعلي منه
انتي ماعليج منه بس انا علي منه والف
هزيت طولي ورحتله
كانت هيئته تدل على ان كبير نوعا ما
مهندم جدا وسيم ولابس نظاره غامجه
شنو مشكلتك ياسيد .. مشبه
ما اعتقد لان خريطة ملامحك ماتوحي بهالشي
معجب .. مصيبه اذا كنت مو تارس عينك
ضحك بهدوء وقالي ممكن تقعد
تعوذت من ابليس وقعدت
شتشرب .. انت من صجك وتوني ياي بهد فيه
ولا اسمعه يقول تحبها ؟
انا اهني غيبت وماقمت اشوف جدامي
بس قلت خل اشوف آخرتها مع كيوبيد
وليش تسأل حضرتك عرف ولف
لا بس فضول واذا ماتبي تجاوب على راحتك وسكت
قعدت اطالعه وماني عارف شسوي
جان ينطق .. بقولك سالفه واتمنى انك
تسمعني للآخر .. قول
كنت اعرف صديق قرر ان يتزوج وفعلا لقاله
بنت الحلال وسبحان الله حبو بعض بطريقه
رائعه لكن قدر الله ان زوجته تكون عقيم
طلبت منه امه ان يتزوج عليها لكنه
رفض .. تدري ليش رفض .. ليش ؟
لأن من كثر ماكان يحبها كان يعتبر
كل لحظه معاها عبارة عن مولود يغنيه
عن الدنيا ومافيها .. ولسوء حظه ان
زوجته اصيبت بمرض نادر وعضال وكان
موتها مسألة وقت مو اكثر .. انصحوه
الدكاتره وشارو عليه ان ينومها بالمستشفى
لكنه ما وافق وجهز لها مستشفى صغير بالبيت
وتم مجابلها لين ياها الأجل .. ماتتخيل
شكثر حزن عليها .. بعد اسبوع من وفاتها
ياله اتصال من اخت زوجته وقالتله عندي امانه
لك من المرحومه وصتني اعطيك اياها بعد
رحيلها .. كانت عبارة عن صندوق صغير
فتح الصندوق ولقا فيه قرشة عطر خاليه
كانت اول هديه قدمها لها بعد زواجهم
وصورة لهم بليلة عرسهم ورسالة قصيرة
تــقــول الــرســالــة
زوجي الغالي لاتحزن على فراقي فوالله لو كتب
لي حياة ثانيه لاخترت ان ابدأها معك
لكن نحن نريد والله يفعل مايريد
وكلمتي الأخيرة لك يازوجي الحبيب ان تتزوج
بعد وفاتي حيث لم يبقى لك عذر وارجو ان تسمي
اول بناتك بإسمي واعلم اني سأغار من زوجتك
الجديدة حتى وانا في قبري
بعد هالجمله حسيت ان جسمي كله صب وتأثرت بشدة
لكني تمالكت نفسي وسألته بصوت متهدج
تزوج بعدها ؟ .. ابتسم بحزن
تم يبجي عليها ايام وليالي لين راح نظره
انزين ممكن اسألك .. تفضل
شنو علاقة هالقصه بموضوعنا
كل العلاقة ياعزيزي
انت ثرت وعصبت على نظراتي لحبيبتك
وانا نظراتي بعد حبيبتي ماتعدت جفن عيني
فسخ نظارته .. وكان لون عينه كبياض
قلب طفل صغير لم تدنسه بعد سنوات الحياة
انعقد لساني .. حس فيني
تدري ليش سولفتلك عن قصتي .. ليش ؟
لأنك لما أنبتني على نظراتي
حسيت من نبرة صوتك انك صادق وعاشق
فحبيت اني اهديك تجربة حب لم يكتب
لها ان تعيش طويلا علها تكون عبرة
لقصة حبك اللي اعتقد انها بدأت للتو
قمت وحبيته على راسه واعتذرت منه
رجعت حق ام الميغ واعتذرت منها
وحبيتها على .. شتنطرووووون مالكم امل
اقولكم وين حبيتها
وللحديث بقية
........
تـــا بــعـــو نــي
