فريجنا القديم كان فيه بيت بالزاوية طلعو منه
اهله وسكنوه ناس يدد.. حزتها كان عمري 13 سنه
وصادف ان اليوم اللي انزلو فيه جيرانا اليدد كنت
نايم عند ولد خالتي لأن كان نهاية الإسبوع
ولما رديت البيت عرفت بالموضوع
وقتها كنت حريص اني اصلي الفجر بالمسيد
ومثل عادتي كنت مضبط المنبه على وقت الصلاة
قمت تيددت ولبست وانا طالع ولا الدنيا
تبرق وترعد قلت اكيد فيها مطره
ومع ان المسيد كان قريب من بيتنا بس قلت
احتياط لازم آخذ معاي ال Umbrella
وفعلا مثل ماتوقعت وانا بنص الطريج مطرت
وقبل لا اوصل المسيد شفت هالمشهد
شايب متوسط الطول .. لابس بشت .. نحيف
بيده عصا .. وكان يمشي يتحسس طريجه
هيئته كانت تدل على ان تجاوز السبعين
دققت فيه وانا اقرب منه واكتشفت ان مو من
شياب الفريج سلمت عليه وحرصت على اني اغطيه
بالمظله لأن المطر بلل ملابسه
وبنفس الوقت مسكت ايده
رد علي السلام وقالي يزاك الله خير ياوليدي
وصلنا المسيد وقبل لا ندش الباب
ونعدي العتبة لاحظته يتحسس العتبة بالعصا
عرفت حزتها ان ضرير (عمي)
(وقبل لا اكمل سالفتي خلوني اقول هالمعلومه للي
عمره مادش مسيد .. معروف ان المسايد بالكويت
يتحكم فيها الشياب وهم اصحاب الأمر والنهي
مثال .. اذا الإمام فيه خير لايقيم الصلاة
بعد ربع ساعه أو على حسب المده المتفق عليها
بين شياب المسيد .. اليوم اللي بعده الإمام متغير
وعندهم ميزه اذا ماعجبهم شي او استنكروه او جد
عليهم جديد بالمسيد تلقاهم
كلهم إيتنحنحون (تنحنح) بوقت واحد
وتعتبر هالإشارة بمثابة كلمة السر)
نكمل سالفتنا الحين
دشينا المسيد وسلمنا ولا حظت ان محد تنحنح
من الشياب .. عرفت حزتها انهم عارفين موضوع
الشايب اللي معاي لإني مثل ماذكرت غبت عن الفريج
يومين وطبعا هاليومين كافين لشيابنا الأعزاء
انهم يعرفون تاريخ الكرة الأرضية مو بس
تاريخ الشايب .. واستنتجت على طول ان الشايب
من سكان البيت اليديد
بعد ماصلينا حرصت على اني اوصل الشايب
وفعلا اول ماقام فزيت بسرعه ومسكت ايده
وسمعت الشياب ينادونه
بــو ر ا شــد
طلعنا انا وبوراشد من المسيد ونشدني عن اهلي
وقلته انا فلان ولد فلان ويدي فلان..إلخ
ولما وصلنا باب البيت وقبل لايدخل قلتله
يبا تسمحلي اقول شي
رد علي وهو يضحك .. قول يا وليدي شعندك
طبعا كان وقتها السن يحكم يعني السؤال
حده دفش .. ليش محد من عيالك وصلك المسيد
طبعا بوراشد فهم شنو قصدي
ريـال عود وضرير وبرد ومطر المفروض مايطلع بروحه
رد علي وقال ياوليدي
اللي بقلبه الصلاة ماتفوته
حزتها ما استوعبت قيمة هالجمله ومعانيها
لكن بعد جم سنه وبعد ماكبرت وشد عودي
اذكر قعدت على صوت المنبه وكان ذاك اليوم
برد ومطر وكان حزة صلاة فجر
قلت بيني وبين نفسي خل اصلي بالبيت
وفعلا صليت ورديت نمت
وبعدها بجم سنه قمت اسمع صوت المنبه واسوي
نفسي ما اسمعه وارد انام وبعدها وبعدها
وتميت نايم وماصحيت إلا لما سمعت ان
بوراشد يارنا توفى .. حزتها اذكر
صفنت ورحت بعيد
وقلت الله يرحمك ويحللك
فعلا اللي بقلبه الصلاة ماتفوته
وعرفت ان هالجمله تحتاج لعزم وإرادة وقبلهم
إيمان وبصيرة قبل لايوقفها مطر أو كبر سن
أو أي عارض مهما كانت شدته
واذكر اني بعدها بجم يوم كتبت هالزهيريه
أو أي عارض مهما كانت شدته
واذكر اني بعدها بجم يوم كتبت هالزهيريه
ــــــــــــــــــــــــــــــ
يوم البلد كانت فقر اعـطيـت من مالي
وبعد الغنا صار البلد يبخل علي مالي
سـوري ومصـري غني وكـويـت انـا مالي
........
يحجي بوراشد يشتـكي سبعين انـا عمري
شـايـب وعـودي حـدب كـله تـعـب عمري
نصـه قـضيـتـه بحـر نصـه سـفـر عمري
........
انا بـنـيـت البلـد وإبـيـت انا مالي
ــــــــــــــــــــــــــــــ
ومن بعدها قمت اكتب بإسم بوراشد
تيمنا بإسم هالشيخ الصالح
(اللي فعلا يستاهل ان يطلق عليه شيخ
مو شيوخ هالأيام اللي يتاجر بأحلام الناس
ويفسرها واللي يتاجر بشهادته ويسوي برامج
واللي يتاجر بسيرة الرسول(ص)
ويسوي من ورا اشرطتها شركات)
لكن شتان مابيني وبينه
فعلا اتمنى اني اكون مثلك يابوراشد
لكن للإسف مااملك
عزمك
ولا
إرادتك
ولا ارقى لمستوى
إيمانك وبصيرتك
.....................
تـــا بــعــو نـي
.....................
تـــا بــعــو نـي
