قبل سنتين وشوي تقريبا دفرت على عالم
المدونات بالبداية كنت مثل اي واحد دخل
على عالم يديد اسماء مستعارة وصور جذابة
وشعارات جميلة ومواضيع مابين الملتهبة
والدافيه تبون الصج شدني هالخليط المتناقض
وبديت اشارك كمعلق وكان أول تعليق لي
عند مدونة بيت القرين وكان عبارة عن زهيرية
وبعد فتره شاورت نفسي وقلت ليش ما افتحلي مدونه
حالي حال هالعظماء يمكن اصير مثلهم
المهم بلشت بالبداية بكتابة بعض الزهيريات
بعدين تطورت وقمت اكتب عن السياسة
ولقيت تفاعل جميل من معشر بني تدوين
اللي يشجعني واللي يرحب فيني وكان الوضع
جدا وردي مثل فلم أليس في بلاد العجائب
ومع تعمقي بهالعالم بديت اشوف آراء
ماتوافق مع قناعاتي ومن باب حرية ابداء
الرأي قمت اكتب وابدي رايي ببعض الامور
سواء كانت سياسية او اجتماعية او دينية
هناك من تقبل وهم قلة قليلة لكن السواد
الأعظم من جنرالات التدوين ما عجبهم الوضع
اذكر ان واحد من قادة التدوين السياسي
دخل معاي بالخط من خلال المسنجر
ومن عرض الحديث اللي دار بيني وبينه ان
دير بالك من هالمدون لأنه شيعي
ودير بالك من هالمدون لأنه بدوي
ودير بالك من هالمدون لأنه فداوي
وبعدها بفتره قليلة القاه طايحله غزل
مع المجموعه اللي يذم فيها
ومن عرض اللي صادفتهم قارورة كانت معاي
ارق من النسمه وبعد فتره يوم شافت مامني
فايده اقلبت علي لي درجة انها امسحت مواضيع
من مدونتها والسبب ان تعليقاتي كانت
من ضمن هالمواضيع
يمكن البعض منكم يتساءل ليش قاعد اكتب
هالمعلومات
اكتبها علشان اوضح شغله الا وهي
ان الكثير ممن يدعون الوطنية وتارسين مدوناتهم
بمواضيع ظاهرها المصلحة الوطنية وباطنها
مصالحهم الشخصية ابتداء بمصلحة فرخ النسر
القابع تحت سرهم مرورا بمخابيهم
وينتهي الطريق عند معازيبهم اللي يحركونهم
وهالأمر ينطبق على النسوان والرجالة
بس ضربت المثل الأكبر على الرجالة
نظرا لحساسية مجتمعنا من ذكر القوارير
تعودت اني اكتب بإسلوب صريح ناشف ومن
غير رتوش وما اعتقد اني راح اغير اسلوبي
لأني اكتب من راسي وبقلمي لا احد يامر علي
ولا حزب يوجهني ولا تكتل يفرض توجهه علي
وهذا الفرق بيني وبين خياش التدوين السياسي
ويمكن يكون اسلوبي منفر للكثير
لكن بالنهاية وبالنسبة لي
هو الطريق الصحيح للإصلاح الحقيقي
وقبل لا اختم بقول هالكلمتين
مو مشكلة انك تكتب بإسم مستعار
المشكلة انك تكتب بإسمك الحقيقي
وانت بكبرك عبارة عن استعارة
ادري اسلوبي جدا حاد
لكن للأمانه سليبي جدا ناعم
P:
علبالكم خلص البوست حامض على بوزكم
البعض يترواله ان الكويت مالته بروحه
يعتقد ان لازم نكون على هواه او نكون كخه
قبل فتره كان بوصلوح ملك الأرواح والقلوب
مو شي واليوم بوصلوح يوم رد يغرد معاهم
صار خوش ولد
قبل فتره كان الدويسان مو شي
واليوم صار ممطاز
اول ما نجحو البنات صارت هليله
واليوم يوم البنات مامشو على رايهم
صارو كلش موشي
مايعجبهم الا تكتل الميانين اللي
كل اربع ثواني استجواب
وللعلم يا خياش التدوين ورعاعه
راح نتم في بلعومكم شوكه
واما فقع يسر الصديق
واما ممات يفلش الطراثيث
والحين يلا دي دي دي
وهل يعقل غير هذا الكلام يامعشر
بني فقعان
معلومة اخيرة
يقولكم من عجائب الحيوانات
ان النعامه اللي تدفن راسها بالرمل
تعيش 75 عاما
وليحيا عالم النعام الثائر
:~
