أهلا و سهلا و مرحبا فيكم
كيف الحال ؟؟
:))
يحييكم الرفيق متفائلوش اللي يكتب لكم في ضيافة الرفيق بو راشد السادس عشر اللي تكرم علي و عطاني هالمساحة الغالية أكتب فيها بما أن مدونتي مغلقة من فترة قديمة و صايرة محدودة .. المهم انتوا شلونكم عسى مرتاحين و كله زي الفل
أنا واحد من الناس ماني مرتاح .. عسى ما شر ؟ ما شر الحمد لله .. بس الديرة وضعها مقلق بالنسبة لي و ما هو طيب .. و الأمور مغيمة جدامي بغيم أسود ما أدري شاللي وراه .. طبعا كان ببالي إني أكتب موضوع طويل تعليقاً على الحوسة الأخيرة اللي صارت و مواقف نوابنا اللي تلفونا بعنترياهم و اللي كل ماله و تردنا ورى .. بس قلت اليوم أبدي بشغلة بسيطة.. على قولة بو خرشد أندومي صغير أبين لكم فيه شلون عمكم و رمزكم و زعيم قلوبكم منتهية صلاحيته رسمي .. اهو و الضمير مالكم
و بعدين يمكن عاد إذا صارت لي مقاقة أكملم و أقولكم اللي بخاطري أكتبه .. و اللي أدري انه اغلبكم ما راح ايوز له بس عاد اللي مو عاجبه يطق راسه بأقرب كيبورد .. طبعا اللي اهو الكيبورد اللي قاعد يكتب فيه .. و إذا ماله خلق خل يناديني عشان أشيل الكيبورد و أفضخ راسه فيه
المهم يا جماعة الربع شوفوا معاي هالفيديو اللطيف اللي اهو عبارة عن مقطع من مقاطع يوميات الرمز و الضمير بمجلس الأمة
طبعا مالكم شغل من تعليقات اللطيف اللي حاط الفيديو لأنه عقليته من عقلية الناس اللي يعيشون نظرية المؤامرة و اللي كل شي عبالهم لصالح التجار و المتنفذين و الحيتان و الدماء الزرقاء
المهم ..
نشوف ويا بعض ؟؟ يالله نشوف
للي ماله خلق يشوف خل أقولكم شصار
---
(.:..) طبعا ببداية الفيديو تتكلم أسيل العوضي وسط صراخ الكابتن مسلم البراك و تقول بكل بساطة :
ما نقدر نشتغل جذي !!
طبعا ما تقدرين تشتغلين وسط الصراخ هذا ولا في إنسان طبيعي تصارخ فوق راسه و يقدر يشتغل
(30 :..) الرومي يقوله : بو عبد العزيز تفضل ..
انزين عطاك الدور الحين الصراخ شماله ؟؟
أنا أقولكم ليش .. خو انتوا مساكين ما تعرفون شاللي قاعد يصير
اللي قاعد يصير إن الرمز اكتشف مؤامرة خطيرة تدور وراء الكواليس و يقوم فيها عبد الله الرومي
هذي المؤامرة تحاك من قبل المتنفذين و اللي يتضايقون من مجلس الأمة و يريدون فيها تعديل الدستور و من خلال التعديل يوصلون إلى الغاء الدستور و من ثم الغاء مجلس الأمة و الديمقراطية
عبالكم عبد الله الرومي لما قال تفضل بو عبد العزيز معناته بيعطيه الدور ؟؟
لااااا
أصلا هذي حركة مكشوفة و على أساسها كتلة العمل الشعبي راح تقوم باستجواب رئيس الوزراء
و يتكون الاستجواب من ثلاث محاور
المحور الأول : شلون أسيل تقول ما نقدر نشتغل جذي .. و منو اللي عطاها الحق انها تتكلم بهالاسلوب مع الرمز و الضمير
المحور الثاني : بأي حق عبد الله الرومي يقول تفضل بو عبد العزيز !! شنو واحد من الربع ؟؟
لازم يقول الزعيم و الضمير حامي حمى الدستور و المنافح الأول عنه أحمد عبد العزيز السعدون
و إذا حذف عقاله بعد يزاه الله خير
المحور الثالث : نشوف تالي على حسب المزاج
(36:..) عبد الله الرومي : تفضل أنا قاعد أقول تفضل !!
لوول عبالك انت قاعد تحاجي ناس يسمعون ؟؟ هذيل بس يبون يسمعون صوتهم و صوتهم بس
(50:..) الرمز السعدون : لا تستطيع أن تمنعني !!!! لا يمكن أسمحلك ما راح أسمحلك !!
الحبيب لي الحين عايش الدور لما يرد على وفد النظام العراقي .. ترى اللي جدامك عبد الله الرومي مو عزت الدوري
الريال يقولك تفضل بو عبد العزيز و انت تقول لا تستطيع أن تمنعني
لووول ليش لازم هالعنترية و الصراخ انا ماني فاهم
(1:02) السعدون لي الحين يصارخ : لن نسمحلك !! ما راح نسمحلك أبدا !!
(1:11) طبعا يبدأ الحين السعدون بالكلام بالطريقة المؤامراتية المعروفية .. اللي يسعه يقول اسكت
بس سمعوا بعد شوي رد الوزير العفاسي عليه
(2:14) السعدون : سكتنا وايد !!
شنو يعني سكتنا وايد ؟؟ إذا انت و مسلم سكتوا وايد عيل منو اللي يتحجى ؟؟
لوول كل شي لازم مؤامرة و يسوي فيها انه اهو منقذ الكويتيين
(20 :2 ) السعدون : صوت على التعديل و إلا لن نسمح بالجلسة أن تستمر !!!!
هااا عرفتوا عمكم شنو نظامه !!؟؟ يا هالمركب يا ما أركب ..يا تمشون على رايي و على كلامي يا أعفس عليكم الجلسة
و الحين اللي قاعد يصير أهو جزء من عنتريته .. يا تخلوني رئيس المجلس يا أعفس الديرة عليكم
يا تخلوني الزعيم صج يا أديها عليكم استجوابات لما تنبط جبودكم
يا تخلوني الرمز غصبن عليكم ولا أعفسلكم الديرة .. ما عندي مشكلة احرق الديرة المهم أنا و بس
واهاهاهاهاهاها
(3:40 ) وزير الشؤون العفاسي يقولهم : عطونا فرصة شوي ..!!
الريال يبي يتكلم و مو راضين يخلونه
(3:50) الوزير العفاسي بكل بساطة : أنا باعرف من وين جابوا النص اللي بدون أجر !!؟
طبعا مع انه ذكر لهم النص الصحيح
لووول طلع الموضوع و الصراخ فشوش و ما عليه أساس .. بالله عليكم جم موضوع صارخوا فيه بهالأسلوب و طلع فشوش ؟؟
عليكم الحساب
(4:16 ) الوزير العفاسي : يبي يشوشون على الناس !!
و الله انك صاج ما يبون الا يشوشون على الناس بأي طريقة عشان يطلعون فيها يعني احنا اللي ندافع عن مصالحكم
(4:50) الوزير البصيري : ما ممكن ان الحكومة تقبل بتشغيل كويتي أو غير كويتي و تعطيه إجازة من غير أجر
(5:11 ) الوزير العفاسي : لا تسوون مداخلات كثيرة تشوشون علينا انا باعرف بس من وين جابوا كلمة من غير أجر شوشوا على المجلس شوشوا على الناس الحضور
لوول عبالك تحاجي ناس طبيعيين ؟ الله يعينك عليهم
بس سكتهم و الله .. تلاقي ماكو نص بس جذي من كيفهم حلمانين وسووا لهم جنازة عشان يلطمون فيها .. كالعادة
(5:31) الوزير العفاسي : ليش الصراخ يا جماعة ليش التشويش ليش التهويل ؟؟
و الله انك على راسي .. سكتهم .. بس وين اللي يسمع
( 49 : 5 ) العفاسي يخاطب مسلم البراك : رح .. و تقول تعرف ؟!
لوووووووووووول .. و الله انك قوي يا العفاسي .. على راسي
(5:55) يطلع صوت نشاز .. عبالي المذيعة اللي تطلع مع ميشيل مال قناة المستقبل قبل : إلااااااااك
يا ملقه
لووول
----
المهم
و الله هيك أمة بدها هيك زعيم
ها لي الحين مقتنعين فيه ..؟؟
انا بس أبي اسأل سؤال حق عشاق الزعيم و الضمير
بغض النظر منو الصح و منو الغلط في هالحوار .. ما كان من الممكن إنه يتم المناقشة بطريقة و بأسلوب أسهل من جذي ؟
ما كان من الممكن انهم يشتغلون بهداوة و حتى لو شافوا غلط يبيونه بطريقة أبسط ؟
ما كان من الممكن انهم يصوتون على التعديل بدون لا يصارخون ؟
و بالأخير ماهو من الممكن .. انهم يطورون من طريقة حوارهم و نقاشهم بحوار و نقاش يخدم البلد ما يدمره
عرفتوا الحين ليش صراخهم اللي صاير عمال على بطال بكل شاردة وواردة و على كل كحة قالوا استجواب و مساءلة
إذا هالنوعية تترجون منها شي حق البلد أنا ما أقدر أقول إلا
الله يخلف على عقولكم ..
و ما أقول إلا الله يعينكم على نفسكم إذا هذا زعيمكم و هذا ضميركم
و للحديث بقية إذا الله جعلنا من الحيين
