لايخفى على احد ان حديث الساعة اليوم الجويهلوخلونا ناخذ الموضوع من جذوره وليش وصلنا
لي هالمستوى الرديء بالطرح
ــــــــــــــــــــــــــــــــ
قبل فترة طلع لنا واحد من العظام وقال بما معناه
ان اهل المناطق الداخلية خذو حقهم والحين دور
المناطق الخارجية انهم ياخذون حقهم
واسترسل في غيه وقال ان النفط موجود بالمناطق
الخارجية والى آخره من هالفكر البغيض
ــــــــــــــــــــــــــــــــ
والحين طلعلنا الجويهل وقال ان الكويت حكر على اهل السور
وان الكويتيين جم عايله كانو عايشين بشرق
وجبله والقروية واهل فيلجا وبعض المناطق
المتفرقة بانحاء الكويت ومن هالكلام السخيف
اللي يخالف كل اعراف الدولة الحديثة وتطورها
ــــــــــــــــــــــــــــــــ
ضربت المثلين اللي فوق علشان ابين ان لكل فعل
ردة فعل بما معناه ان النفوس مشحونة من زمان
وياما تكلمنا وقلنا ان الديرة فيها مافيها من
عقد واختلافات واللي صار كان شي طبيعي نتيجة لدفن
الرؤوس بالرمال وعدم مواجهة الواقع المرير
واللي زاد الطين بله ان بعض من يفترض فيهم انهم
يكونون اكثر الناس حرصا على ترابط نسيج هالمجتمع
للأسف بدال لايستخدمون ادواتهم الدستورية والقانونية
شفناهم يلجأون لتأجيج الشارع بطريقة ان دلت
على شيء فإنها تدل على انهم
ما تعلمو درس الغزو وماسبقته من احداث
ــــــــــــــــــــــــــــــ
ختاما اقولها انا المواطن البسيط من خلال
مدونتي اللي تعبر عن رايي الشخصي
الكل يتحمل المسؤولية حكومة ومجلس
وما استثني الشعب اللي يشترك معاهم بالمسؤولية
كلنا مشتركين بهالجرائم اللي قاعده تحصل
بحق هالوطن المغلوب على امره
اللي اشبهه بالمكعب المملوء بالألوان
هالمكعب اذا حطيته بإيد من يعرف يتعامل مع
الوانه قدر ان يرتبها بالشكل الصحيح
واذا طاح بإيد من يريد ان يلعب بحسبته
راح تكون النتيجة مريس
ارد واكرر
تعلمو من درس الغزو لان الكل عينه عليكم
والله المستعان
