سألني صديق ليش احمد السعدون بالفترة الأخيرة تلقى اسمه
على اي طلب طرح ثقه او استجواب او كتاب عدم تعاون
ويسترسل بسؤاله
معقوله رجل بحجم احمد السعدون وتاريخه يوصل فيه الحال
ان يقرن اسمه مع بورميه والبراك والمسلم وطاحوس والصيفي
بالشارده والوارده
عدلت قعدتي وقلتله اسمع يا بوفلان
احمد السعدون مو بهالغباء اللي انت متصوره
الرجل بالسنوات الأخيرة ادرك ان الوصول الى كرسي
الرئاسة جدا صعب خاصة وان جرب اكثر من مره ومانجح
اعتقد وحسب تصوري ان الرجل يعتقد ان لابد من العوده
بالأيام للوراء علشان يستعيد المجد الضائع
واقولك شلون يستعيد امجاده
لوتلاحظ معاي ان احمد السعدون بآخر مجلسين قاعد
يحاول بكل قوة ان يوصل للحل الغير دستوري
والشواهد على هالشي كثيره
بس اتضحت بشده باستجواب رئيس مجلس الوزراءالاخير
وخاصه بعد ما اصر ان يقدم كتاب عدم التعاون معاه
وكان يعتقد ان بهالحركه ومع وجود اربع استجوابات
منها ثلاثه لشيوخ ومو اي شيوخ رئيس وزرا ودفاع وداخليه
ان الجماعه راح يفيض فيهم الكيل ويلجؤون لتعليق الدستور
وخاصة ان الأمير بكل دور انعقاد كان يركز على اعطاء
الحكومة فرصة قبل لا يفكر اي عضو ان يحاسبها
وكان السعدون يصر بعد كل خطاب للامير ان يأزم
من خلال الفرسان اليدد للإستجوابات
قاطعني صاحبي وقالي
انزين شنو اللي راح يستفيده السعدون من الحل الغير دستوري؟
بكل بساطه يابوفلان اجاوبك
راح ينزل للشارع من جديد ويفرض نفسه زعيم للمعارضه
واعتقد ان الظروف الحاليه وايد افضل من ظروف
الحل ايام دواوين الاثنين كون وسائل الاعلام
انتشرت وخاصة الفضائية منها ومع الاخذ بعين الاعتبار
ان امريكا الداعم الاكبر للكويت من اشد الناس
الداعين للتمسك بالديمقراطية
يعني بحسبة عقل لو تعلق الدستور سنه او بالكثير
سنتين بالنهاية راح نرجع للعمل فيه مره ثانيه
وطبعا حزتها راح يكون لبوعبدالعزيز
وجماعته ايا كانو الحظ الاوفر من مقاعد المجلس
اليديد وابصملك بالعشره ان هالسناريو ان صار
راح تشوفه رئيس للمجلس
كانت هذه رؤية متواضعة مني للوضع
يمكن اكون مخطأ ويمكن اكون على صواب
لكن من خلال تجربتنا مع احمد السعدون
اشوف ان هذا اللي قاعد يخططله الرمز
سكت صاحبي وانا طلبت راس تفاحتين
وخذيتلي فره على المدونات
وتفاجأت ان الشله نست الإستجوابات الأربعه
وماسكه قناة سكوب وطايحه فيها تبهذل
خلصنا من موضة الوطن ودخلنا بموضة سكوب
