يعتقد بعض من ابتلينا فيهم بالكويت
ان مصلحة الوطن وهمومه حكر عليهم
دون غيرهم والأدلة والشواهد على هالإعتقاد
كثيرة ويكفي ان نشوف بعض المسميات
الصارخة كـ أم الدستور ويدته وخالته
ويكفي ايضا ان بين كل يوم والثاني نشوف
حملة وهيصه وزمبليطه ومطالبات برحيل
مسؤول وكاميرة وبقالة
مشكلة هالبشرية انهم يعتقدون انهم
اذكى من غيرهم ومعطين لنفسهم الحق
انهم يشكلون مسار حياتنا على كيفهم
اضحكني كلام احداهن لما قالت ان صديقتها
من كثر حرصها على المال العام
جلبت اوراق للطابعة من مالها الخاص
وصورت بطابعة الحكومة
ردت عليها احدى الأخوات وقالتلها
والكهربا والحبر وانا ازيد عليهم
والوقت اللي استغلته صديقتج من دوامها
علشان تطبع لعيالها
هذامايعتبر من المال العام؟
هذي العقليات اللي نتعامل معاها
هذي العقليات اللي حامله على عاتقها
اصلاح البلد
ومن العقليات اللي ابتلينا فيهم
من يدعي اليوم ان احمد الفهد لازم
نغض النظر عن اخطاءه السابقة لأنه حامل
لواء الإصلاح الإسكاني وعفا الله عما سلف
خوش كلام وبهالمناسبة خلونا نعفو عن
علي الخليفة لأنه الرجل بالسنوات الأخيرة
فتحله قناة وقاعد يوظف الكويتيين
وقناته قاعده تطرح قضايا تهم البلد
وتستضيف رموزكم وضمائركم وحنوجكم
عجبا على تعجبكم وعجبا على اعجابكم بنفسكم
وعجبا على نقطة تعجب P:
الكويت اهم من اوراق دستوركم وحروفه
وارقامه وطلاسمه
الكويت يوم غزاها الجار البائس
وفي عز محنتها وقف نفر ممن ابتلينا فيهم
بذاك الوقت وساومو القيادة السياسية على
ان تأييدهم لها مرهون بشروطهم واللي
كان اهمها عودة تطبيق الدستور
وإلا بنسكر الباب بويوهكم
ويوم توفى امير الكويت الشيخ جابر
رحمة الله عليه وقف نفر ممن ابتلينا فيهم
وأزمو البلد بوقوفهم مع صف ضد صف
وكانو يراهنون انهم بوقوفهم هذا سوف
ينالون المجد والعز والسلطة
واليوم في وقتنا الحاضر وقف نفر ممن
ابتلينا فيهم يأزمون البلد بكل ما اوتو من
قوة وبإصرار غريب ودون النظر لمصلحة
الوطن وأبناءه
ضاربين عرض الحائط بالظروف اللي تعصف
فينا من كل صوب
وكل هذا من اجل ماذا
كلمة السر المكتوبة بحبر الشاهي
الذي يملأ استكانات الوطنية
ا ل م ص ل ح ة
هذا ماجرته علينا الديمقراطية
ودام ان هالعقول موجودة
فالخير بقبال
التزمت منذ بداياتي التدوينية بالصراحة
واتخذت منهجا لا أحيد عنه
ان ارائي تمثلني ولاتمثل غيري
يعني بالكويتي المفتشر
ماتفلسفت ونصبت نفسي قائد وزعيم
مثل ماقاعد اشوف هاليومين من بعض
المهسترين والمهسترات
اخيرا كلمة سمعوها من كويتي
لزم ارضه يوم كانت محتلة وما انحاش
وسرح ومرح بأرض الله الواسعه
الكويت عندي ومصلحتها ومصلحة شعبها
اهم من كتيبكم المملوء بالأحرف الجوفاء
عقدي مع ديرتي واهلها
كلمات حفظناها عن ظهر قلب
الكويت أولا
اقول قولي هذا وانا قاعد
اجر احلا نفس من مقرنا العامر
الواقع بقلب الكويت
ومابين اسوارها الثلاث
