تقول احداهن ان قلة الأدب تسقط الحجةوتقول الأخرى ان الناس مع الخيل ياشقرا
ويقول احدهم اني اخاف اتكلم وازعل غيري
ويقول الآخر ان المشي على حبل القيم
صعب ودقيق
هذي بعض الكلمات قريتها والصراحة
ماقدرت استوعبها
وخلوني ادش بصلب الموضوع
في مجموعة من البشر دائما ماتكون
شاطرة في حكمها على الآخر لكن لما
يوصل التقييم عند اطراف اثوابهم الطاهرة
تجف اقلامهم
مثال
وحدة من اللي المثالية واصلة لي هدب
عيونها كانت تقول عن اللي يتبضعون من
البلوكات هيلق لان الموضوع كان يحتاج
انها تكون مع الخيل ياشقرا
مثال ثاني
واحد من اللي مايحبون يمشون على
حبال السيرك مستعد ان يمشي على كرة
كبيرة مثل الفقمة علشان يسعد زميله
اللي قاعد يمسخر خلق الله بكل امكانياته
مثال ثالث
وحدة من اللي الأدب لابسها من راسها
الى اخمص قدميها تلقاها تقول رايها
بموضوع لزميل اقرب مايكون الى الافلام
الإباحية وتقول بملأ فمها
ابداع يا زميل ماسطرته بقلمك
عن مغامراتك قبل الزواج
مثال رابع
واحد يقول مايبي يزعل احد
وهو لو تقوله نكته علباله ان اهو المقصود
زبدة الحجي
كلنا لنا آراءنا الخاصة فينا
لكن بالمقابل
في ناس ترصد كل حركة وكل كلمة
فإذا كانت بيوتكم من هلام
فلاترمون غيركم بفقاعات الفضيلة
وانتم ابعد ماتكونون عنها
والحمدلله ان حرية الرأي
مكفولة للجميع
بما فيهم هيلق البلوكات
وبما اني انطلقت من جديد
وبما اني امون على بعض الناس فليسمحلي بهذه المشاكسة
اللي ادري انها راح تكون مثل البلسم
على قلبه لاني اعرف معدنه وسعة صدره
تعودنا من نشأة ديرتنا ان تكون الكويت
فوق كل شي مهما كان لهذا الشيء من قدسية
لكن بالمقابل في حقيقة لازم نحطها جدام
عيون المكحلات وعيون التقدميين الطارئين
واللي اهي ان لا كلمة تعلو على شرع
الله سبحانه وتعالى
اشياء شربناها من صغرنا ان لا طاعة لمخلوق
في معصية الخالق
عاد اذا كان عندكم توجه غير اللي نعرفه
فدعوة مني ان تطلقوها صريحة
وتدعون الى تغيير القسم اللي يقول
الله
ثم
الوطن
الأمير
بعدها يكون لكل حادث حديث
ولي رجاء آخر ان لاتكون بطولاتكم
من وراء الكيبورد
اتمنى تكون بطولاتكم امام الملأ
وبعدها خلونا نشوف ان كنتم ستحملون
على الأكتاف
او راح تكون النتيجة نعل من كل لون ونوع
تسقط على كشيشكم وروسكم المرفوعة
من وراء شاشات الكمبيوتر
اخيرا
مابي اتفلسف واقول اني رجعت بناء
على طلب الجماهير
لأن الواقع يقول ان محد درى عن هوا داري
إلا بعض الأحبة
لكن رجوعي كان لأني شفت ان ماعندي سالفة
تحياتي للجميع
طارئين ومخضرمين
فداوية وثوريين
مؤدبات ومثاليات
حشاشين وامهات ألحي
فخوذ وبطن وظهر
وسلمولي على
شرفاء التكتل
وماانسى
الدستوريين
ولا عزاء لصاحب هذه المقولة
نحن قوم اعزنا الله بالإسلام فإن ابتغينا
العزة بغيره اذلنا الله
غير هالحجي ماعندي
لكن تعودت على المتحذلقين
والمتفيقهات
ملاحظة
لحد يشره علي لأني رافع الجام
