عيزت اقنع الروح تنساك لكني فشلت
حاولت اشيلك من وسط يوفي
كل ماجيت اغير الدرب شرقت
والاقي كل المشاوير لدروبك توديني
...............
بوراشد وآخرتها معاك موصحيح اللي تسويه
بعمرك .. كل شي وله آخر .. مايجوز ياخوي
العمر يمشي وانت لي الحين متعلق بوهم
كان هذا كلام بوخالد
...............
انت صح بس انا مخي مركب شمال وهالوهم
اللي تسولف عنه اذا ماصار بلاها حياة
وشوفة عينك قازره ومحد ياخذ إلا نصيبه
...............
شهالحجي !! وحدة الله اخذ امانتها والثانية
راحت بنصيبها .. مو معقول تجير حياتك
على هالقصتين ؟!!!
...............
لحظة لحظة بوخالد .. القصة الأولى نهاها
القدر وانا راضي بقسمة ربي لكن الثانية
باقوها مني بوق والقصة ماانتهت بالنسبة لي
...............
من صجك بوراشد ؟ الكلام اللي تقوله لايرضي
شرع ولا عرف ولا تقاليد راحت البنت تزوجت!
...............
وانت شايفني مرابط عند بيتهم وقاعد تحت
بلكونتها وماسك جيتار واغني وينك اناديلك تعال
يا اخي كيفي بحبها من بعيد لي بعيد انت شكو؟
...............
شلون شكووو! وانا اشوفك دامر حالك بالتفكير فيها
بعدين شلون تحبها من بعيد وتوك قايل بعظمة
السانك ان القصة ما انتهت وانهم باقوها منك
شناوي عليه علمني ؟ تعرف شي ما اعرفه
واذا فرضنا لا قدر الله انها تطلقت بتاخذها ؟
...............
بوخالد واللي يرحم والديك مالي خلق مثاليات
انا وعمري ننياز .. تطلق / ألكه / اشم هروين
السالفة بالنسبة لي خاربة خاربة
بعدين تعال تعال تعال ..
تقولي عادات وتقاليد وقيم ودقوس صبار وشرع
بالله عليك ماتقولي احنا من صغرنا شكبرنا عليه
علمونا ان روبن هود شريف وهو حرامي
ليلى ماتسمع كلام يدتها وضربت صحبة مع الذيب
هيلن مالت تروي هدت الملك وانحاشت مع رفيجها
عبدالوهاب اكبر مزور الحان ويسمونه
موسيقار الأجيال .. عنتر يغازل بنت عمه
ويقول فيها شعر ماجن وجذوب وبعارين حمر
تاريخ الخلافة الأموية والعباسية والفاطمية
وغيره متروس جرايم وخروج عن الشرع والدين
وكانو يدرسونا اياه غلط بالمدارس والجامعة
حتى بباي اللي كانو يحطونه بالتلفزيون
كان فيه وحده اسمها بيتي بوب كانت
تمثل كركتر لفتاة لعوب
ولي يومك .. شيوخ دين إلحاهم لي ركبهم
ويتاجرون باحلام الناس .. يتاجرون بقراءة
القرآن .. يترسون بطول ماي صحة خزعبلات ويبيعونهم
على ابونا بركة .. وغيره وغيره وغيره
ردت علي انا لأني حبيت وحدة قبل لاتزوج
وتزوجت ولي الحين احبها وحبكت منظومة
الشرع والعادات والتقاليد والنخي والباجيلا
يا اخي انا موزين ومجتمعك فاضل
خلني ادش النار واحترق :/
................
بل بل بل كليتني بقشوري .. كيفك يبا كيفك
بس علمني شناوي عليه ....؟
...............
شوف يا تطلق بس ما اكون السبب بطلاقها
يا يصير زلزال وينهدم بيتهم ويموتون وتعيش اهي
او اني اموت قبل لايصير هذا كله
غير هالحجي ماعندي
...............
تطنز مع ويهك .. انا شايل همك وانت تبعطز علي
الشره مو عليك علي انا اللي احاتيك
...............
شرهتك وصلت بكل وسائل التقنية الحديثة
تويتر وفيس بوك وفوقهم واتس آب وقناة سكوب
ومشكور ويزاك الله خير واحسنت وميرسي
عندك شي ثاني بتقوله
...............
سلامتك .. بس ماعلمتني عن المغتربة الي كلمتني
عنها بسفرتك الأخيرة .. اللي امها اجنبية
.. هااا اشوفك صفنت بورشود ؟
...............
العن خيرك وانت ماتنسى شي .. هذي سالفتها غير
...............
شلون غير .. حب سبير نفس سبير السيارة
...............
ياااااااملغك .. في شي اسمه حب وفي شي
يسمونه / اعجاب / حاجة / لجوء عاطفي
نفس لجوء دعيج طف الليت فج الليت لطرقات
الشعر وهي بعيدة عنه كبعد ام النمل عن فينس
ما انكر اني تعلقت فيها وحاولت اقص على عمري
واقنع نفسي اني احبها وفعلا خدعت نفسي فترة
وعشت الجو وطلعنا واستانسنا وتعشينا بماك
وارتشفنا القهوة بستار بوكس وشيشنا بخمسة باوند
لكن فجأة ومن غير مقدمات وكنت حزتها قاعد معاها
بلوبي فندقي الأثير مرت علي فاتنتي وكانت مع
غريمي وطاحت عيني بعينها .. آآآه يابوخالد
...............
سلامتك .. مو وقت ام كلثوم بوراشد علمني شصار؟
...............
مو توك مساع الشعراوي وعادات وشرع وفستوووق
الحين تبي تعرف شصار ؟ ماعليه راح اشفي غليلك
ايها المدعي المتلون كالحرباء
شفتها نسيت عمري ولمحتني ونست الدنيا
لحظة ماتنوصف .. كانت المسافة بيني وبينها
امتار لكن النظرة اللي بينا كانت شبر
صبت عظامي والقلب خفق الإيد ترجف والعين
ابحرت بعينها .. اهي وقفت والعيون غورقت
سمعت دقت قلبها عندي وحسيت بالنبض على صدري
سعتها تقول بوراشد اسمي كان على شفايفها
نسمات الهوى اللي بينا كانت عمرنا اللي
قضينا مع بعض / كلامنا / ضحكنا / ألمنا
لميتها ولمتني .. شكيتلها وبجت
طلبت منها تتم معاي لكن ظروفها اعتذرت مني
وقالت ماعليه .. يمكن مرة ثانية ترجعلك
حزتها صحيت من الخدعة اللي كنت عايشها مع
غيرها .. عرفت ان اهي بس اللي تملكني
...............
غزيت الفكر والروح والقلب والعين
احتليتني كلي استبحت كامل مساحاتي
اسرت عقلي ونفسي سكنت الشرايين
ياتعتقني كلي اوبيدك تطوي صفحة حياتي
...............
وللـــحـــديـــث بـقــيــة
تـــــــا بــــعـــو نـــي
